Jaga Jee Laganey Ki Dunya Nai Hai

اَنُوکھی وَضْع ہے سارے زَمانے سے نِرالے ہیں

یہ عاشِق کَون سی بَستی کے یا رَب رَہنے والے ہیں

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

جَہاں میں ہیں عِبرَت کے ہَر سُو نَمُونے

مَگَر تُجھ کو اَندھا کیا رَنگ و بُو نے

کَبھی غَور سے بھی یہ دیکھا ہے تُو نے

جو مَعمُور تھے وہ مَحَل اب ہیں سُونے

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

مِلے خاک میں اَهلِ شَان کَیسے کَیسے

مَکیں ہو گئے لا مَکاں کَیسے کَیسے

ہوئے ناموَر بے نِشاں کَیسے کَیسے

زَمِیں کھا گئی نَوجَواں کَیسے کَیسے

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

زَمِیں کے ہوئے لوگ پَیوَند کیا کیا

مُلوک و حُضُور و خُداوَند کیا کیا

دِکھائے گا تُو چَند روز کیا کیا

اَجَل نے پچھاڑے تَنومَند کیا کیا

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

اَجَل نے نہ کِسریٰ ہی چھوڑا نہ دَارا

اِسی سے سِکَندر سا فاتِح بھی ہارا

ہَر اِک چھوڑ کے کیا کیا حَسرَت سِدھارا

پَڑا رَہ گیا سَب یَہِیں ٹھاٹ سارا

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

تُجھے پَہلے بَچپَن نے بَرسوں کِھلایا

جَوانی نے پِھر تُجھ کو مَجنُوں بَنایا

بُڑھاپے نے پِھر آ کے کیا کیا سِتایا

اَجَل تیرا کَر دے گی بِالکُل صَفایا

یَہی تُجھ کو دُھن ہے رَہُوں سَب سے بالا

ہو زِینَت نِرالی ہو فَیشن نِرالا

جِیا کَرتا ہے کیا یُوں ہی مَرنے والا

تُجھے حُسنِ ظاہِر نے دھوکے میں ڈالا

وہ ہے عَیش و عِشرَت کا کُوئی مَحَل بھی

جَہاں تاک میں ہَر گھَڑی ہو اَجَل بھی

بَس اَب اِس جَہالَت سے تُو نِکَل بھی

یہ طَرزِ مَعِیشَت اَب اپنا بَدَل بھی

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

یہ دُنیا فانی ہے مَحبُوب تُجھ کو

ہُوئی واہ کیا چِیز مَرغُوب تُجھ کو

نہیں عَقْل اِتنی بھی مَجذُوب تُجھ کو

سَمَجھ لینا اب چاہیے خُوب تُجھ کو

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

بُڑھاپے سے پا کر پَیامِ قَضا بھی

نہ چَونکا نہ چِیتا نہ سَمبھلا ذَرا بھی

کُوئی تیری غَفلَت کی ہے اِنتہا بھی

جُنُوں چھوڑ کر اَب اَپنے ہوش میں آ بھی

جَب اِس بَزم سے چَل دِیے دَوست اَکثَر

اَور اُٹھتے چَلے جا رَہے ہیں بَرابَر

ہَر وَقت پیشِ نَظَر ہے یہ مَنظَر

یَہاں پَر تیرا دِل بَہَلتا ہے کِیُوں کَر

جَگہ جی لگانے کی دُنیا نہیں ہے

یہ عِبرَت کی جا ہے تَمَاشا نہیں ہے

جَہاں میں کَہِیں شُورِ ماتَم بَپا ہے

کَہِیں فِقر و فاقَہ سے آہ و بُکا ہے

کَہِیں شِکوَۂ جَور و مَکْر و دَغا ہے

غَرَض ہَر طَرَف سے یَہی بَس صَدا ہے